in ,

2021 Peugeot 2008: ‘n Sjiek en sjarmante Fransman wat harte gaan laat swymel

peugeot

This post is also available in: English

Deur Dirk Gallowitz van Ultimate Drive

Peugeot se indrukwekkende nuwe 2008 is onlangs in Suid-Afrika bekendgestel. Ons het die plaaslike bekendstelling in ‘n papsopwinterwaternat Limpopo bygewoon en sommer ook die buksie kort daarna in die sonnige Kaap vir ‘n week onder hande gehad.

 Die 2008 is ‘n kompakte sportnuts wat ook as familiemotor vir ‘n kleinerige familie kan diens doen. In hierdie segment, wat wêreldwyd al hoe gewilder word en ook in Suid-Afrika die verkoopsyfers aan die rol hou, spook meeste motorvervaardigers kliphard vir ‘n plek en die mededinging is straf, om dit sagkens te stel. Een uit elke vyf motors wat in SA die vertoonvloer verlaat, kom uit hierdie segment.

Na die onlangse bekendstelling van Stellantis, die nuwe sambreelnaam vir Peugeot/Citroen oftewel PSA Groupe en die Fiat/Chrysler/Alfa (FCA) wie saamgesmelt het om die 4de grootste motorvervaardiger in die wêreld te word, is die 2008 die eerste model uit hierdie konglomeraat wat in Suid-Afrika bekendgestel is.

Voorkoms en Ontwerp

Die nuweling word op Stellantis se nuwe generasie CMP (Common Modular Platform) onderstel gebou in die Stellantis Vigo aanleg in Spanje waar petrol, diesel en toekomstige elektriese aandrywing gemonteer word. Die 2021-2008 is na ons mening seker die mooiste in sy segment met ‘n forse aggressiewe neusontwerp waar treffende LED 3-klou hoofligte en stylvolle dagryliggies wat volgens Peugeot aan die slagtande van Sabre-tand tierkat herinner, onmiddellik aandag trek. Die prominente lugskort voor onder die neus onderstreep die 2008 se sportiewe gene.

Tipiese Franse flair kenmerk die 2008 se binneruim met pragtige ontwerplyne, vlakke en hoeke. Die afwerking en gehalte is uitstekend in wat loshande die mooiste kajuitontwerp is wat ons in ‘n lang tyd gesien het. Die groter 3008 is met ‘n kortkop tweede.

Die voorpaneel word rondom die bestuurder gevou met digitale instrumentasie en skakelaars wat meer tuis is ‘n futuristiese ruimtetuig laat. Agter die pragtig ontwerpte stuurwiel is Peugeot se 3de generasie “i-Cockpit” in 3-D beeltenis wat ritinligting aan die bestuurder in ‘n waas van sagte beligting projekteer.

Middel bo in die voorpaneel is die hoë definisie kleur infotainment skerm (7” vir die intree Active en 10” vir die luukse Allute en Topmodel GT-Line) ook effe na die bestuurder gedraai. Hierdie skerm bied SatNav asook klank en kommunikasie met Android Auto en Apple CarPlay funksionaliteit. Ook die tru-kamera beelde, ritlinligting met meeste van die voertuig en funksionele inligting wat hier besigtig en verstel kan word.

Die stuurwiel beskik oor skakelaars vir die telefoon en die 10 luidspreker Focal klankstelsel met ‘n 515W 12 kanaal versterker. Ook die skakelaars om die inligting en uitleg op die 3-D instrumente paneel te verander, asook skakelaars vir spoedbeheer en om stemopdragte te gee is netjies hier verpak.

Die nuwe 2008 kom toegerus met omvattende aktiewe en passiewe veiligheidstelsels asook nuwe generasie bestuurderhulpstelsels soos ondermeer gonsers wat waarsku as daar uit die rybaan wegdryf.

Blindekolwaarskuwing, aanpasbare spoedbeheer, parkeergonsers, parkeerhulp, ‘n stelsel wat die verkeerstekens herken asook ‘n stelsel wat die bestuurder betyds waarsku teen ‘n moontlike botsingsgevaar. Verder is die nuwe 2008 toegerus met 6 lugsakke, traksiebeheer asook ABS met eletroniese stabiliteitsbeheer en noodremming.

Die nuwe 2008  bied ‘n dubbelvloer bagasieruim vir ‘n maksimum laaispasie van 434 liter. Die agterste sitplekke kan 60:40 platvou om nog groter laairuimte te skep.

Enjin en verrigting

Plaaslik is die 2008 beskikbaar met twee weergawes van Peugeot se 1.2liter turbo petrolenjin.

Kopers kan kies tussen ‘n 74 kW/205 Nm of 96 kW/ 230 Nm kragbron waar die 96kW weergawe slegs met ‘n 6-gang outomatiese ratkas beskikbaar is. Drie modelle is tans in SA te koop met die intree 2008 Active model wat met ‘n opsie van die 74kW enjin gekoppel aan die 6-spoed handratkas, of die 96kW enjin wat met 6-gang outokas toegerus is.

Die middelvlakafwerking “Allure” en “GT-Line” topmodel is egter slegs beskikbaar met die 96kW enjin en 6-gang outomatiese ratkas. Ons het slegs die GT-line gery en was beïndruk hoe gemaklik die enjin reageer wanneer versnel moet word om verby te steek, selfs in die dun Hoëveld lug. Die 3-silinder turbo was lewendig met die 230Nm wringkrag wat vir gladde en gemaklike verrigting in stadsverkeer gesorg het.

Die bestuurder kan kies tussen drie ritmodusse, naamlik Eco, Sport of Normaal. My gemiddelde brandstof verbruik aan die rand tydens bekendstelling was 6,9L/100km en hier aan die kus na meer as 1400, was ons beste verbruik 6,5L/100km en slegste 7,1L/100km. Indrukwekkend inderdaad.

Padinamika

Tydens die bekendstelling het ons byna 450 kilometer afgelê in gietende reën wat stadsverkeer, ooppadry asook redelike ente papperige modderpaaie ingesluit het. Die 2008 het mateloos beïndruk met goeie hantering, uitstekende padgedrag en ‘n sublieme rit. Gly-gly deur die nat modder was ons verbaas hoe vasvoet met goeie greep die Fransman deur die glyerige modder genavigeer het.

Tydens ons week se toetsperiode het ons ook heelwat van die Weskus se sandpaaie probeer. Ook hier het die 2008 met vlieënde vaandels geslaag.

Dit dien vermeld te word dat die 2008 toegerus is met wat Peugeot noem, “Grip Control” wat ‘n keuse bied tussen sand, modder en sneeu. Tydens die bekendstellingsrit kon ons die pap modder op die Bosveld grondpaaie ervaar en in die Weskus die dik los sand van die Sandveld se plaaspaaie. Die 2008 het in beide gevalle gemaklik gery waar meeste voorwielaangedrewe stoftrappers in hierdie segment heel waarskynlik sou vasval.

Op die snelweë het die 2008 ook beïndruk met ‘n goed geïsoleerde kajuit wat min wind- en padgeraas deurgelaat het. Die onderstel en veerstelsel was, tipies van Franse motors, heerlik sag en gerieflik.

Slotsom

Die 2021 Peugeot 2008 het beïndruk en ons harte oorrompel met ‘n sjiek stylvolle voorkoms en uitsonderlike ritgehalte en padgedrag vir hierdie segment. Dit is mooier, stylvoller, beter ontwerp, beter toegerus en beter afgewerk as enige van sy kompetisie in hierdie hoogs mededingende marksegment. Met ‘n kompeterende prys is die nuwe 2008 moeilik om te ignoreer en gaan hierdie Fransman baie harte in Suid Afrika wen.

Boonop met Stellantis nou self aan die stuur van sake wat betref verspreiding, handelaars en naverkoopdiens in Suid Afrika, gaan baie van die plaaslike Peugeot aanhangers die spoke van die verlede kan ignoreer. Vive le France!!

Die 2008 word verkoop met ‘n 5 jaar/100 000 km waaarborg en 3 jaar/60 000 km diensplan ingesluit.

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Loskop Pluismeule onder nuwe bestuur

AfriForum en Saai staan boer by met indien van strafregtelike klagtes oor beweerde silosertifikaatbedrog