Die Suurlemoenfees vind in Menton in die suide van Frankryk plaas. Die dorpie is ook bekend as die Stad van Suurlemoene danksy hulle groot sitrusproduksie. Hier vind elke jaar ‘n skouspel plaas waar reusagtige strukture en vlotte van sitrusvrugte gemaak word.

Die La Fête du Citron of liewer, Suurlemoenfees is ‘n unieke ervaring wat meer as 250 000 besoekers elke jaar lok. ‘n Hoogtepunt van die fees is die Goue Parade waartydens vlotte, versier met sitrusvrugte in die aand langs die kus van Promenade du Soleil beweeg. Tussen die vlotte beweeg orkeste, volksdansers en ander musikante om ‘n ongelooflike atmosfeer te skep. 

Verdere opwinding word geskep deur die Biovès Tuine. Hier word volgens tradisie deur die stad se kunstenaars massiewe beeldhouwerke gemaak van sitrusvrugte. Meer as 300 mense is betrokke, insluitend sitrusboere, tuiniere, kunstenaars en metaalwerkers. Die massiewe metaalstrukture waarop die lemoene en suurlemoene geplaas word, word deur ‘n plaaslike maatskappy vervaardig. Daar word 500 000 elastiese bandjies gebruik en 140 metriese ton sitrus benodig om die indrukwekkende strukture te voltooi.

Die Suurlemoenfees vind vanjaar plaas vanaf 17 Februarie tot 7 Maart.