Dom Boer se lag vir die dag:

Dom Boer se lag vir die dag:

Nog eksamenflaters uit Die Agterbankers

Die Agterbankers deur Jean Charles, keurig na Menstaal vertaal deur Rina Scheiflinger, is een van daardie boeke wat ‘n mens oor en oor en weer en weer lees sonder om ooit vir hom moeg te word.

Kom ons kyk vandag na die wyshede van nog ‘n paar agterbankerskoliere onder eksamendruk:

• Aangesien die boere in die Middeleeue geen motors besit het nie, kon belastings nie daarop gehef word nie. Dus moes hulle sout- en persoonlike belasting betaal; en ook op die radio, as hulle een gehad het – wat ‘n uitsondering was, want die mense was bra armoedig. Daar was dikwels hongersnode en, om te voorkom dat hulle sterf, het die mense mekaar doodgemaak.

• Johanna van Arkel, die jongvrou van Orleans, is by die huis gebore. Saam met Edith van Nantes is sy die grootste Franse heldin. Die Engelse neem haar gevange en verbrand haar in Rouen omdat sy ‘n maagd en vol jig was. Sy het lewendig gesterf. Wilhelm Tell was die Johanna van Arkel van Switserland. Hy het ‘n appel met sy pyl deurboor terwyl hy op sy seun se kop gestaan het.

• By die geboorte van sy vader was Lodewyk XIV vyf jaar oud. Hy het geleef tot sy dood in 1715.

• Wanneer ‘n koning geen kinders het nie, volg sy kleinseun hom op. So het Lodewyk XV op die troon gekom.

• In 1768 koop Frankryk vir Korsika aan – drie jaar voor Napoleon se geboorte – om seker te maak dat hy Frans sou wees.

• Tydens die Franse rewolusie was daar baie dienaars wat, liewer as om hulle meesters te verraai, in hulle plek onder die guillotine gesterf het. Toe kalmer dae gekom het, hervat hulle swygsaam diens.

• Napoleon Bonaparte was ‘n groot strateeg. Tydens die Egiptiese veldtog het hy die Jode dwarsoor die Rooi See gejaag.

• Napoleon het die Engelse verfoei. Hy het hulle verwyt dat hulle hom op St Helena laat sterf het.

• Die verskil tussen ‘n koning en die president van ‘n republiek is dat die koning die seun van sy vader is, die president is dit egter nie.

• In 1875 kon slegs mans in die stembus tree om te stem. Om deesdae stemgeregtig te wees, moet ‘n mens aan albei geslagte behoort.

• Die Eerste Wêreldoorlog: Die moordaanslag van Sarajevo was die druppel water wat die lont aan die brand gesteek het.

• Italië het maar ‘n klein bevolking gehad. ‘n Paar jaar later was dit verdubbel danksy die persoonlike inspanning van Mussolini.

• In 1945 los Amerika die eerste atoombom op Japan. Duisende Hirosjinese sterf. Die Japanners het oorgegee toe die skepe van die Amerikaanse eskader oor Japan gevlieg het.